Cinqui ghjorni che no semi persi cuì. L'altru ghjornu è passatu un tipu à parlà ind'arrechja di Petru. Ci ha laccatu un poccu di pani e di quiddu furmagliu sardu (tre volti più altu cà u nostru). In più ci purtatu un brocciu speciali, ma chi nun è brocciu, u chjamani "u gioddu", ma è bonu.
À agnunu a sò razione e ci semi cuntintati.
A sera aghju cantatu à u focu :
Ma chi vita sarà quista:
Una petra pà cuscinu,
À u ventu e a l'acqua,
Esposti à lu sciuscinu.
Una vita di banditu,
Sarà quistu lu fascinu ?
A chi in tarra dorma,
Li si pestara lu spinu !
.
Paisani in anda pà a fiera di u Niolu. LC Canniccioni v 1910
