Cuccu è gioa

Oghji, semi à i primi ghjorni d'aprili e si è intesu u cuccu cantà pà ssi machji !
Cambiemi di staghjoni o ghjenti.

Ziteddu minnana mi cuntava ssa passata :
" Cuccu, cuccu meiu,
Quanti anni aghj'à campà ? "
U cuccu rispundiva, (tandu si cuntavani i "cu") : Cuccu, cuccu, cuccu...

" Cuccaghjolu, cuccaghjolu
Megliu tu cà u russignolu ! "
(a passata di u russignolu a vi cuntaraghju un antra volta)

E ripigliavani dinò, i ziteddetti (femini) :

" Cuccu, cuccheddu
T'imbrigliu e t'insellu
Cuccu dì le beddi diti
Quant'emi à stà à piglià maritu "

I ziteddi pà ssi stretti si sintivani cantà :

" U mè cuccu cantarinu
Ti ni và fronda fronda fronda
Ma ni stendi lu tò volu
Falatine qui una stonda
Chi no parlimu un mumentu
Qui à l'ombra di sta sponda ! " (1)

" Lu cuccu arditu cantò lu Binidittu :
Sustò la bara ognunu stava zittu
E lu corbu e lu filanciu
E u pincionu cu lu scrittu :
Pimpimpì ! e crocrocrò ! Fiunfiunfù ! sol, la, si, do ". (2)

(1) Tradiziunali. G de Zerbi, Cantu nustrale p 221. Scola Corsa, Bastia 1981
(2) PM de la Foata, Poesie giocose, p 26 Marseille 1973

Citazioni 6

" Quali sarà u più tontu di chi cerca à mugna u beccu à chi li porghji u colu par sottu ? "                                                                  ( Lucianu, Demonax, 28 )

Prumessa di fritteddi !

Marititi in paesi, e megliu, in famiglia.

" Tamanta penna ch'aghju stà sera ind'u mè cori..."

" Ma chi t'avarà avutu à Ghjaseppu à parlà cusì ? E vera chi sta sera l'aghju truvatu pinserosu, ma quantunqua pò. Qualcosa c'è ? Ma chi sarà ? "
E cerca e cerca e d'un colpu mi è vinutu à Mariana, l'altru ghjornu à a funtana di Casa Vecchja. Aghju vistu qualcosa, sarà ch'edda ha salutatu à Ghjaseppu, a manu piatta darretu à a coda ?
"Aghju capitu !!!" pinsai, ed eiu zittu e muttu : " Parenti, sò parenti. I famigli sarani d'accordu. A festa sarà di i chjucchi ! Pensa, sta sera è prumessa di friteddi, pà s'istatina ! "

Tandu mi venani in menti i versi di Dumenicu di Maria :

... Di lu nostru anticu amori
Sta sera devu parlavi
E parla un mumentu insemi
E qualcosa à raghjunavi !
Si vi chjama u signuretta
Eo vi chjamu par qualcosa.
Ci averia sempri pretesa
Cum'è legitima sposa...
Siati un poccu generosa...

" Tamanta magnata che noi emi à fà, u ghjornu, oh !..".

 Sarani dui in carri una. E cusi sia !



LC Canniccioni, Musée Fesch* Ajaccio

(donation Ollandini)

www.musee-fesch.com