Tandu aghju dettu à Ottoni : "Vedi, o Ottò, un ti possu dì ch'e partu vulinteri, ma ùn ti pudariu mancu dì chi mi ni vogu mal'vulinteru."
M'ha dettu :"Tè, o tontu, fighjula fora, vidarè un antru mondu, vidarè !"
Aghju fighjulatu, eiu, ùn aghju vistu nudda...
Eddu aviva da stà chi, dumani, l'avivani da taglià a ghjamba, a dritta sopru à u ghjinocchju, chi si sviluppava a cangarena. La sò piagga puzzava.
E pò ci hani fattu un kodaku* tutti insemi (Ottoni si trova à dritta, stesu à i pedi di a capu infirmera Joly. Eiu, mi tengu un poccu più indà, vicinu à Théodore Mourgues e Madamicedda Marie de Mayrore). Quissu, u ritratu, u mi sogu tinutu. L'aghju sempri ancu avali.
*Diciarani avali una "fotò", ma à quiddi tempi era cusì che si diciva : "un kodaku".
