Lighjivu i pagini scritti da Lejean, opara santa, e mi pinsava à ciò chi Zi Gattupardu di a Midunetta aviva dettu (u ghjornu che nò chjappedemi, à a funtana di a Muneta, à Ghjuvan'Carlu dettu Nabulità cù Maria Stella di i Lianumeddi).
"L'amori ? Un annu di focu e di fiara, tren'anni di cenari..."
Tandu eiu : "O zì, è listessu par u mal' d'amori, sapeti ! Sò anni e anni di disgrazii e anni e anni di fredori."
E Ghjuvan'Carlu à cantà, in la sò lingua. Mi n'invengu ancu sempri:
"E par amar' à tia,
Sogu surdu e muttu,
Pattu più che nun patti,
Un dannatu,
Stò ind'i l'infernu,
E ti dumandu aiutu !"*
* Da, Robert Benson, Sketches of Corsica; Or, A Journal Written During a Visit to that Island, p151, London 1825.
