Ch'avaraghju avutu à pinsà, eiu, à Zi Castagnuloni e à i sò struffuletti, quandu eddu, mi diciva -eru ziteddu, eru -" O Sarrà, sè tu chi hai missu u foccu à a funtana !?" (Senza mancu capiscia u rimprovaru !)
E quidda di i chjavi ?
"In quantu à tè quali saria u più riccu d'unu chi teni parrechji chjavi à quiddu chi un ni ha cà una ? Refleti, refleti bè u me ziteddu !"
Eiu : "Quiddu chi n'ha parrechji ?"
Zi Castagnuloni : "È parchigna ?"
Eiu, fieru : "Parchi quiddu chi teni massi chjavi t'ha parrechji porti ad apra !"
Tandu eddu : "Sbagliu maiò u me ziteddu, sbagliu maiori !"
Eiu : " E parchì, o zì, e parchi ?"
Zi Castagnuloni : "A chjavi di l'oru, u me ziteddu, a chjavi di l'oru !!! Chi si sà chi a chjavi di l'oru, sola, apra tutti i porti !"
