Moncourt-Xures

Sett'ori di sera accupemi à Montcourt.
U numicu s'è ritiratu : biottu u bois d'Einville. À l'abbruccà, i tiri d'artiglieria calani pianu, pianu. Avà è u focu di i mitragliosi à tiracci adossu, ubligati semi à rinculà.
A terza e a quarta cumpanii di u nostru 141esimu RI si sviluppani ind'i fossi di u caminu Moncourt-Xures, à cavaddu à a cunfina. 
Battaglii, scaramucci, attachi... contrattachi, attachi ecc...

Martiddati

A notti aghju sunniatu, era un ghjuvanottu, bandera nostra in manu, marteddu à a cinta. Cuddava una tepa : puniva un puntu finali à sta guerraccia.

A de G. 

Bidon bombè

Drouville, 17 aostu.

Hani bumbardatu à Drouville.
Miseria, ci vuliva à veda a piazza, i casi, a ghjenti.
Arristava u campanili arritu.
Un è cà ghjenti luntana e tonta à ridasi di sti cosi cuì.
Ghjenti luntana, for'di u capurali Bidon, capurali d'attiva chi stava ancu noscu, ridiva eddu, s'amusava di tuttu : "Bombés, bombés. Voilà ce que nous vous êtes, des paysans bombés* !"
Sapiva tuttu quistu, tuttu ma nienti altru...

Drouville, 1914

*Sta manera di dì l'hani impiegata insinu à avà o guasgi.

Ridiculi

Paulughjaseppu s'aviva arragnatu una canzona, da par eddu, e cantava :

U rimori di a guerra,

Riscolta vali e monti,

Par sti boschi noi à derra,

Nò circhemi à firmà vivi,

Capu infrugnatu ind'a terra,

Quantu à u ragnu l'amicu,

Evviva à Sampieru,

E morti a lu numicu...

Ridivami, eddu Talmasca e eiu : erami ridiculi, ch'avivami da fà ?

Identità

Stavami cuì, à mezu à sta cianga asciutta, à sta guerra e inumana e pur'umana e, e... mi dumandava ? Mi dumandava, mi dumandava... parchi ? Erani tanti sti parchigna, ssi chi fà, ssi qual' sarà chi ?
Mi pariva tuttu à essa turratu, eiu stessu, "Quistioni"*.
Forza, s'edda è, l'identità umana fonda, fonda, è d'un aveni micca appuntu identità, ma sarà d'intarrugassi (fussi in una lingua o in un antra) ?
E pò, quandu omu è faticatu, piglià e pona un puntu intarrugativu maiò annantu à i cosi i più serii.
Quali sogu eiu ?
Un omu tribbulatu chi à, a guerra, a si porta in odiu.
Listessa, par quiddi chi a ci facciani fà, e à me e à s'astri.

                                  ?


*Quaestioni mi ipso facto sum. Sant'Agustinu

Pampasgioli

"Pianta in tarra e spera in Diu", dicivani i nostri vecchji.
Chi ni sarà di quiddu povareddu paisanoni chi di ghjinnaghju ha suminatu cuì, stu campu.
Avarà pinsatu, eddu, chi u sò travagliu c'aviva da ghjuvà à facci litteri di paglia sbluttita, acconcia par noi altri stesi cui ?
Nò, Diu ci ha fattu, e ha dattu à l'omu u sali, u restu è a tuntia di l'omi, massimu di quiddi chi i guvernani.
Stavami cui, à fiarabattuli, gambetti rossi e ali turchini à traghjà chi ni ? A sapareti voi, ch'eiu un la sogu. Pampasgioli persi in quiddu campu d'avena !
A tinta di mammona a diciva chi "Diu supraneghja".

Cl. Monet, Champ d'avoine et de coquelicots v 1890

http://www.flickr.com, Michelangelo, à ringraziaddu.

À spicchi di u granu

Sta notti emi durmitu in un campu suminatu à biada. L'adori, d'acettu e di meli mischiati, di a paglia m'imbriacava. M'arricurdava u paesi, mamma, i risi, quand'e noi erami zitidducci spinserati.
U tempu s'era imbunitu, a tarra era infusa, ma parò vi scaldava. Si vidiva u fumi cacciassi da i panni nostri e cudda pianu, pianu prima à svanisciasi un si sà induva.
Mi sò stesu vicinu à Paulughjaseppu.
Emi parlatu di sti paesi di a nostra Corsica cara. E pò, ha dettu cusì : "Mi sentu vena a morti, o Sarrà."
Aghju dettu eiu : "A morti è sta sempri in ghjiru à noi. Oghji a diffarenza è chi a "guerra facci, edda, a sighera"* e semi noi altri cum'a spicchi di u granu e distinati à mora, avali. Subitu, subitu. E listessu pà i ghjovanni di paru à noi. Fighjulemi tutti a morti in faccia. È cusì."
Emi durmitu in freccia, a fatica.

Fotò : M Boulanger, Gloria

* L'ha detta Papa Francesu à l'Ave Maria di stu 10 d'aostu 2014. Parla di Gaza e di i sò vittimi nucenti. Da preti Bonnafoux, à ringraziaddu.

Stragi, strigi

Sunt avidae volucres... i prussiani.

Sò acceddi vuraci, micca di quiddi chi cacciavani u cibu in gola di Fineu, ma di a stessa sterpa : grandi capu, occhji fissi, bizzicu fattu à ganciu; cu i penni imbiancati e l'artigli appuntati; di notti bolani in cerca di criaturi senza mammi, e ne vastani i corpi cacciati da i viculi; si dici chi di bizzichi, li strigliani i civi, e ch'eddi s'empiani u lobbiu e ci si biini u sangui.
U sò nomi è striges a radica venaria, chi di notti sò i soli à stridà cusì, uni spavecchju.
Ovidiu, Fasti, VI, 131-140.

Murdernitai, forza

Forza, diciarani doppu chi "(Sta) guerra detta "scumpientu", "désastre" saria l'avvenimentu più nutevuli di u seculu (...) si parlarà di miliai di morti (...) sta guerra, pà i suldati corsi è statu dinò l'uccasioni d'un rapportu furzatu cu stu mondu nuveddu, sfarenti e chi à eddi, s'impuniva.
Massi di quissi scigliarani doppu l'emigrazioni. A scuperta brusca e brutali di a mudernità di u "fora", u sottusviluppu di l'isola stessa si vidiva di di più, chi muti e cuntrastu c'era."*

Un ci semi ancora.

*Addatazioni da : Histoire de la Corse et des Corses, p 551. JM Arrighji, O Jehasse, Perrin/Colonna edizioni, 2008.

Salve Regina mea

Marchjavami à u fronti. Piuviva, sarà a rinfrinscata di Santa Maria (l'avarini u dettu in quiddi luccacci?)
E' prigava :

Ave Maria di grazii piena,
U Signori sia cun voscu,
Fra tutti i donni,
Binidetta siti voi,
Binedettu è Ghjesù,
Di lu vostru senu, u fruttu.

Santa Maria Madre di Diu,
Par noi altri piccatori, prighetti,
E inde la vita nostra,
E inde la nostra morti.

Amen e cusì sia.

Nun è statu colpa mea.

Prima, mi n'eru avvistu, sta guerra un era mea.

À fiancu à Francescu è statu u guastapiglia
Una cosa quissa a sogu, nun è statu colpa mea.

E sentu pianu pianu a stizza chi mi piglia.
U cori batti forti u sangui ind'i le veni ci batti u parapiglia,

Parapompon

"Marchons, marchons, 
Qu'un sang impur abreuve nos sillons,
Parapompon !.."

À tre ori di mani, marchja da Parroy à Drouville : Hénaménil, Bauzemont, d'Einville e salini, fiumi fiumi à u Breuil, Maixe e Saline de Maixe, Grandes Poudres e infini Druvilla.
Ci hani mandatu cuì da rinfurzà i ligni. Dui ori di marchja furzata, à lestra andatura, certi ancu a patenscia... ch'avivani incurpurati suldati novi, novi à rimpiazzà i nostri, morti, firiti e spariti.
Un corsu, n'ha rimpiazzatu un antru : Paulu Ghjaseppu, Piracciu quistu cuì.
Omu beddu maiò, avvezzu à u duru, surridenti e piacenti.
U babbu facci u bancalaru, era bancalaru anch'eddu. Un omu di mistieri, di a me classa in più !
M'ha dettu : "Ti cunnoscu, l'acceddu. Mi pari, t'aghju dighjà vistu !"
E duranti la marchja, Talamasca : "Dumani, l'hani dettu à u campu chi ghjunghjani i Corsi. U 173esimu, Aiaccini e Bastiacci, da Corti e d'Albertacci. C'emi à batta ancu n'eddi fiancu à fiancu. 
Veniti, i Corsi à noi..."
Ghjunti in Drouvile ci mandedini doppu à Bures, di i bosci un si n'è vistu manc'unu. E, pruccu ch'edda durga...

Meza sizzioni

Firiti, spariti e morti.
U sargenti Talasca circava à fà a lista.
Di a meza sizzioni, trent'omi :
Dui morti,
Quattru spariti,
E dinò quattru, listessu,
Par l'omi chi sò firiti.
Vinsimi à trenta e vultetimi à vinti e rinforzu manc'unu, e par me dumandava una citazioni.
Sta volta emi persu, ha pigliatu stu versu, ma nienti è finitu, vultemi à la sizzioni.

Mépris, disprezzu

A mani, Olive stava bocca aparta, balbuttulava :

“Le désir est si grand d'aller à l'ennemi,
Et de pouvoir, se mesurer à lui, 
Compagne du danger, le mépris,
Que l'on peut redouter,
De devoir l'affronter,
De façon insensée.”*

(*L'ha dettu Foch, ma d'un antra manera)

Mi manca (10)

À P.

Arisera, ind'a notti aghju sunniatu à te. 

T'aghju vistu passà, vivu, alegru accantu à me.

Veni à dì chi se cuì, ancu puru se tu, ancu noi un ci sè.

Zi Baldone

Di ssa ghjurnata di l'11 d'aostu 1914 si ni parla ancu sempri avà, par divvi !
Versu à undici ori di mani emi varcatu a fruntiera ma in quidd'altru senzu. Un c'era nimu, tandu, à gridà : "En avant !", a vi possu assigurà, ch'andavami "en arrière".
Olive mi stava sempri vicinu. Pò essa u fattu d'avè purtatu insemi à Francescu e pò doppu d'essa stati tremindui in quiddi troncacoddi. Fà chi, un'amicizia era nata. Un diciva tantu ma si sapiva tena ed era prudenti e più.
Emi marchjatu semi passati par Xures e ci semi istalati ind'u campu furtificatu di Parroy ?
Un avivu cà voglia di dorma, e basta.
È passatu à Talmasca, neru.
Ha dettu : "Ti ni sè surtitu ? Sè tu chi ha tombu l'uffiziali di u regimenti di i cavalieri ?"
Eiu : "E chi ni sogu, eiu."
Eddu : "È detta : sè tu e basta. L'aghju da marcà ind'u rapportu, stà sera cuì, in Parroy, canton de Vic."
Ci n'era unu in paesi chi marcava tuttu com'à Talmasca un aghju mai sapiutu s'eddu si chjamava Zi Baldoni o Zibaldoni ? Zi Baldone facciva u sicritariu di a merria.
E chi n'avara fattu doppu di tutti sti paperole ?

Apocalypse now

À ott'ori sta mani è passatu un aviò, prussianu. L'emi cunnisciutu, a la sò bandera nera.
Aviò, incattrachinu, ch'eddi faccini avali*. Cummandante "Allonzenfants" (chjamemi lu cusigna), un si veda, quistu, ancu i sò truncati. 
À nov'ori sta mani, sintiati i baddi passà à rasu, rasu : Ziiiiiiiii...
A bandera giadda d'un battaglioni numicu, sbocca à la nostra dritta. À manca, un di quiddi uffiziali Uhlan (di i regimenti di cavalieria) s'affacca à meza piana. Sentu una cannunata, ind'aria l'obus schiatta. Sparitu ch'eddu è u fumi, u cavaddu impetta, senza più cavaglieru.
A bestia si svoglia, si ni fala, ma a truppa avanza.
Tiremi e tiremi à dinò, i numichi un avanzani più, si tenani imbarrati.
Avà tirani eddi : salva d'artiglieria, cannunati, sparati e tiri da partutu. 
Avà semi presi, presi à focchi cruciati. 
Da centu metri à noi, una massa cumpata, truvemi davant'à noi, cumpanii numichi.
A mitraglia ci tocca, sò baddi e cannunati chi ci falani adossu.
Rinculemi in darretu, si spicca a cumpania.
Capitanu Rotonde casca, toccu, è tombu.
L'Uhlan, à a gola ci strigna.
Unu e dui e tre e quattru pieghemi e ripieghemi, intruchjemi e pò... ci ritiremi.
Tarrori generali, si senti unu chi mughja : "Bataillons z'en arrière, bataillons z'en arrière".
Qual'è chi l'ha dettu, un si sà mancu avà ? Scappifughji tutali.
U cumandanti "Allonzenfants", di u ghjornu d'innanzu, vistu pò, un s'è.
Quantu ch'eddu avissi vistu eddu u Diavulè.
Vargogna à te.

*cf. u bigliettu di u 27/12/2013

Cù, http://www.provence14-18.org. à ringraziaddi.

Periglii

À a Corsica.

O madri cara,
Tu chjami li tò figlii,
Unu è sepoltu,
E l'altru ind'i periglii.
A tò voci più nun sentu,
Ne menu li tò cunsigli.
Prega l'agnulu custodiu,
Chi a morti nun lu pigli.

JB Marcaggi, Les chants de la Mort et de la Vendetta de la Corse, p 332, Perrin, Paris 1898

Sancta Clara

U ghjornu innanzu, c'è statu qualchi cummandanti à dì : "La frontière ! Allons les enfants, en avant et vive la France !"* Stu tontu, salutava a vittoria, ch'avivami dà varcà a ligna di a cunfina.
"Vive la France" e "mortu à Francescu", e s'eddu un c'era cà eddu...
Erami tribbulati. Talmasca, eiu, Olive e s'astri...
Sò ghjunti in quattru à piglià i corpi cu una diligenza à quattru cavaddi marcatu d'una bandera bianca cu a sò croci, rossa.
Ghjesù, Ghjiseppu, Maria, Santissimu Sacramentu ora tutti in cumpagnia, aiuttatecci. Prighemi !

In, sangui

U varmu è ind'a petra,
U preti è in a zennica,
U sali è ind'a zucca,
I soldi ini stacca,
U viziu, eddu, è in corpu,
L'acqua devi essa in bocca,
A bigota è in ghjesgia,
Nò semi in tempu di guerra,
E a badda è in capu.
Chi, sangui di i petri, un si ni caccia, è vera.

U duveri di mora

Noi dicivami Lagarde, i bosci eddi, Gerden.
A notti l'emi passata culà.
Ancun' certu Olive, emi inguttupatu u corpu di Francescu ind'u sò cappottu e l'emi missu nantu à un catralettu, chi quachi brancardieri u purtessi in darretu, dumatina. Avivu fattu un poccu di frasca ch'eddu stighi megliu cusì.
Da sett'ori e mezu à mezanotti emi pruvatu à rinfurzà i difesi di u paesi. Ci voli à di dì ch'erami passati da culanda di a fruntiera, erami annantu à i tarra chi i Prussiani ci avivani presi ind'u settanta. À meza notti passatu durmivu. Aghju ripigliatu a vardia à 3 ori di mani : nudda, u campu era tranquiddu, i prussiani s'erani ritirati.
Pinsava, eiu, à a povara mamma e à u povaru babbu di stu Pughjulincu, mortu cuì... Par chi ni ?
U duveri, aviva fattu u sò duveri.
Dunqua, era di mora cuì, u sò duveri, a bedda affara...
Un si ni pudiva mora, tranquiddu, in paesi ?

A fruntiera à Xures à 5 chilometri da Lagarde

10 d'aostu 1914, Lagarde, sett'ori di sera

Aghu intesu "pifffa". U soffiu di a badda.
Francescu u Pughjulincu si n'è falatu seccu. Mi stava accantu. Un aghju circatu mirè, chi mi sogu subitu avvistu ch'eddu era statu tombu à u primu colpu, à a prima fucilata. Una badda in fronti, à dritta, appenna soppr'à l'occhju. Sarà qualchi fucilieru numicu imbuscattu.
Mi sò lampatu guasgi sottu à eddu d'un essa anch'eiu sottu à u focu tudescu.
Ha fattu : "Umfa...", 

e s'è addurmintatu par u sempri in quidda ciangaglia Meurthe-e-Moselana. Vicinu, c'era un muru da pudemi piattà e tandu aghju rampicatu à mettami à l'ascosu e l'aghju tiratu vicinu à me. Pinsedi : U tintu, ha campatu sempri a risa in bocca e sta volta a badda in capu... a  ragana pò, u silenziu.
Francescu è statu lu primu a mora. Un ha avutu da veda à Lagarde nostra.
Ma chi vita è, quista ?
O Sa Laren' preghi par eddu, par noi, senza vinu ne friteddi...

René Magritte, La Mémoire (1948)

Guerra

Guerra, guèrra, guèrru, guera, verra : [wɛrra] n. f, plur. guerre, guerri, guerra.

1. Lutta armata aparta e dicchjiarata tra dui o più Stati (av. 1294, B Latini e Folcacchiero de' Folcacchieri, in Monaci 113): Lutta armata contru à l’'oppressori ; guerra di liberazioni, a guerra mundiale, guerra di u quatordici. Quista è detta : "guerra di fora". 

2. Usi estens.: 

   a. G. civile o cittadina o intestina o interna, combattuta tra i cuncittadini di u stessu statu divisu in fazioni, è detta "guerra d'indrentu".

   b. G. fredda (calcu dell’ingl. cold war)

   c. ant. o poet. cumbattimentu, cuntrastu (1313-19, Dante ; come "turmentu amorosu."

   d. Vindetta, statu di discordia frà dui o parecchji parsoni, famiglii : mettesi in guerra contru à qualchid'unu, à qualchid'uni.

> Sin. : lotta armata, cunfrontu, cunflagrazioni, ostilità, stragiu.

> Ant. : paci.

> Pruv. : "Bella, horrida bella", Oraziu. "Guerra incuminciata, infernu scatinatu" ; "Guerra, pesta e caristia vanni sempri in cumpania".
> Abbrev. : W, gu.

> Cit. : "Morrte, perché m'ai fatta si gran guerra." Giacomino Pugliese (1210-1266); 
"In la Grand Guerra nascianu miraculi di stracci" Santu Casta u Ingallaratu 2011; "Vanità dei beni della fortuna per li quali il mondo ribuffa, s'azzuffa, fà guerra, si batti". Dante Alighieri, Divina Comedia, l'Inferno, cap. VII. 
Ini sancritu, a guerra è, युद्ध yuddha, veni à dì : "desideriu d'avè più vacchi".

# Germ. wërra, "micci" dà ligà à l'ant.-altu ted. (Fir-)wërran "avviluppà". Pà i raghjò di l'abbandonnu in tuttu a Romània di a parrodda currispondenti lat. bēllum, si pò piglià in contu l'ipotesi chi "la sostituzione ci mostra il prevalere del disodinato modo di combattere dei Germani sull' ordinato bellum dei Romani" (Migl. St lin. 78). Cfr. G. Rohlfs, Romanische Sprachgeographie, München, 1971, pp. 111-112 e carta n.51. (1)

Da e à ringraziaddi :

A mimoria paisana. 

Dizziunarii :

Corsi : u Ceccaldi, u Falcucci, u Filippini, u Maiò, u Marchetti, u Sicurani

Taliani : (1) DELI, Zanichelli ; Il grande dizionario dei proverbi italiani, Zanichelli. La poesia italiana del medio evo, Desclée de Brouwer. Renzo Tosi, Dizionario delle sentenze latine e greche. Rizzoli libri, Milano, 1991

Francesi : Dictionnaire historique de la langue française, Robert, 2011.

Siti di u web :

http://infcor.adecec.net; 

http://www.etimo.it;  http://www.dizionario-italiano.it; http://www.meltingmots.com. http://www.sanskrit-lexicon.uni-koeln.de; Wikipedia

Dumani

Dumani è festa in paesi.
Dumani è Sa Larenti come nò dimmi, noi. San Larenzu, dicini certi.
Mi sò sempri piacciuti, à me, ssi ghjorni festivi, falavami da i Petri bianchi. Messa, tiru à u ghjaddu, prucessiò furmata à doppiu stolu, dinò messa, basgi à u santu, questula, frisgetti rossi e giaddi (n'aghju sempri unu ini stacca)... Dicini ch'ind'i tempi davani ancu panioli binedetti (com'à quiddi di a Sant'Antoni). Dicivani dinò ch'u tiru à u ghjaddu si facciva ancu par Pasqua ? Mutani i tempi...
A sera chjami e rispondi.
Santu Biasgichinu vinciva sempri chi t'aviva l'estru e a sò musa sempri era in vena. Attaccava lestru, lestru :

Prò semi stati à li ghjocchi,
Or' tucchemi à li canti,
Sa Laren' è ghjornu santu !
E si qualchi d'unu risponda,
Ch'eddu mi fussi ghjustu accantu
Ha da senta par ssi sponda
La me musa fiaricanta
Linguifini parodda chjara,
E chi tutt'agnunu incanta...

Qualchi fucilati, e cumpivami a nuttata à mora, tecchji à friteddi e vini di piaghja. Trimavani i casi.
Dui, mila, mila, mila !
Ottu par ottu !..
Mora, muredda ! "U numaru cinqui s'era surpatu u puteri signadori di a manu sparta, divintò dinò anch'eddu u incantu da parà "l'occhju" (Westermarck)"*. A mani frimavami arrighiti o megliu, à voci mancu appenna.

A cota 283 era in vista, ci semi...



*H. Camps-Fabrer et M. Morin-Barde, « Amulette », in Encyclopédie berbère, 4 | Alger – Amzwar [En ligne], mis en ligne le 01 décembre 2012, consulté le 11 août 2014. URL : http://encyclopedieberbere.revues.org/2487

Cota 283

Versu cinqui ori di mani emi francatu una ligna d'artigleria di i nostri.
O ci voli à veda i cannoni, certi pezzi !
L'omi erani pronti à tirà, l'avemi salutati e emi capulatu, più indà, versu à i ligni di i prussiani.
Cavaddi, à tiraddi tutti sti cannoni ch'e vi dicu, ci n'era più cà u ghjornu di a San Brancaziu in Aghjacciu, pinseti ! Sintivati i mulatteri, runcineri, sunnaglieri...
Dipoi chi sogu ghjuntu in sti Francii aghju imparatu ciò chi parlà pinzutu vò dì : i "u" i diciani "ü". Diciani : "Hue !" (difficiuli)  par di dì : "Iò !", "la lune", par "luna", "la prune" (a prugnula)... "l'obus", "il a bu" (ha bittu).
Aghju dinò imparatu "l'eu" (quistu, ancu più difficiuli) : "i peuneux", "malheureux", "peureux" (paurosu)... Mì à eux, ces bleus !
L'"an" i diciani "an", è cusì, chi vuleti.
Aghju imparatu dinò parrechji paroddi francesi. Ma i nomi di i paesi, quista è un antra affara.

Marchjavami versu a cota 283.

Carta di u statu maghjori. Geoportail.gouv.fr

Nomi

Se a morti avessi da avè un nomi t'avaria u tò visu.

Bula

Bula ind'u luntanu, bula u trenu di s'ultimi luciori,
Suldati abbambanati, a tò baldanza scuzzula,
S'inchjinani i coddi, u sò fronti sbussula
Musca adori di tabaccu, di lana e sudori.

Comment vous regarder, sans voir vos destinées ?

Aragon, Le roman inachevé, 1956

Citazioni 39

Postu ch'Eddi voni che nò morghimi, tandu emi à frimà, vivi !

Sargenti Talmasca

Marchjavami e pinsavu, ma comu sarà che nò semi ghjunti insin'à cui ?
Vezelise, un pari mancu u nomi d'una villa, Vezelise...
U trenu capiscu : un tipu dà l'ordini, u trenu muta via e suvita a sò strada. Basta à infurra u carboni. Quista sì. U tipu chi guverna u trenu t'avarà carti, telefonu, cumandi pà i focchi di a circulazioni e pò u facci andà induva eddu vò ch'eddu voghi. E pò, un trenu, un è nudda. Nienti altru cà una massa d'acciaghju cun tipu indrentu chi cunducci siconda à l'ordini ghjà dati.
U trenu, capiscu.
Ma noi altri ?
Ascimitti da u vinu, da i canti e da ssi basgi dunneschi, da vistiti carnavaleschi, cu l'arnesi fucileschi, quali sarà à aveci mandati cuì ?
Ci truvemi pettu à pettu cu un'armata numica, quissa, sì.
E eddi com'avarani fatti à ghjunghja insin'à cui ? Un mi rispondeti micca "cu u trenu" chi quista a sogu.
Com'avarani fattu à ghjunghja e truvaci tutti cuì ?
Quali ci sarà à dà st'ordini superiori, e chi semi tutti, ascimitti che no semi, cuì à suvità.
A sogu m'eti à dì "u destinu" ("Natu u fantinu, scrittu u destinu". "Ciò chi hè scrittu in celi, in tarra segui". "Natu a parsona, natu u distinu". "À chi nasci, pasci..." A sogu, i cunnoscu sti detti e sti contradetti), o m'aveti ancu da dì, puru, a "mala sorti".
Forza ?
Eru cuì à mezu à a piazza à a esgia e mi dumandavu quali eddu era à avemi cumandatu d'essa cuì sta sera. Comu sarà che no semi cuì ? Rispundeti... se vò a sapetti.
"Talmasca !"
Talmasca ? Talmasca, à u tantu, isiè, sarà statu eddu.
Sargenti Talmasca, suldatu Sarratu fora, à vostru cumandu !

U ghjornu chi Bocchineru (Talmasca) ridiva.

08/08/1914

Prospera fortuna !

Départ de Marseille à sett'ori di sera. Avignon, Le Teil, (doppu durmivu. Ancu assai chi Talmasca marca tuttu !), Givors, Lyon-Vaise, Mâcon, Chalon, Dijon, Is-sur-Till, Chalindrey, Neufchâteau, Vezelise.
Avaremi missu più di 18 ori. In più c'era ancu da perdasi ancu certi nomi !
Ci vuliva à veda a ghjenti ci inviavani fiori, bombò, vi faccivani bia, magnà.
Cantavani a Marsegliesa : " Allons enfants de la patrie... Aiò, ziteddi..."
Erami noi, eroi vivi, custreti d'andà à mora, a bedda affara !
Vezelise, anh, anh ! Pinseti, oh, tre casi e un forru !
Francescu, facciva u tontu, à parà a sorti ?
"Dicu à te, dicu à te :
Salutu e viziu, salutu e viziu !
Da Scalindrè, da Scalindrè, 
À ghjunghja à Veseliziu !
A mani un cafè,
A sera chi deliziu !"

Vezelise, Meurthe et Moselle (!)

Gara

À a povara Ghj. S 
"U rumanzu comencia in una gara ferroviaria, a lucumutiva sbuffuleghja, uni ziffulu di pistoni copra l'apertura di u capitulu, un nuvulu di fumi piatta una parti di ssi primi ligni. Ind'adori di a gara passa una vintata d'adori di u buffet di a gara. C'è qualchisia chi fighjula à traversu à i vetri impagnati, apri a porta à vetri di u bar, è tuttu nebbiosu, ancu indrentu, comu vistu da occhji bagliuli, ancu puru occhji rossi scaldati da i graneddi di u carboni. Sò i pagini di u libru à essa impagnati com'à i vetri d'un vecchju trenu, è nantu à i frasi stessi chi si sponi u nuvulu di fumi. È una sera piuvosa; l'omu entra ind'u bar; si sbuttuneghja u sò capottu umidu; un nuvulu di vapori l'avvoglia; un fischiu parti, longu à e vii, à perdita d'occhju lucicanti d'acqua di piuvicinedda.
(...)
S'assumigliani tutti i gari; pocu importa si i luci nun riesciani à aluminà più ind'a d'un chjerchju sbavatu, è un ambienti che tu cunnosci à mimoria, cù ss'adori di u trenu ch'arresta doppu chi tutti i treni sighini partuti, l'adori speciali di i gari una volta mossu l'ultimu trenu. I luci di a gara e i frasi chi tu leghji pari ch'eddi s'abbiani da sdrughja più cà di fà veda i cosi ch'affiorani da un velu di bughju e di nebbia. Sogu sbarcatu in questa gara sta sera par a prima volta ind'a me vita e mi pari d'aveci passatu una vita intera, intrendu e surtendu da stu bar, passendu da l'adori sottu à u tettu invitratu à l'adori di sigatura infusa di i gabinetti, tuttu mischiattu in un unicu adori, quiddu di l'attesa, l'adori di i cabini telefonichi quandu un arresta cà à raccoglia i gettoni chi u numaru chjamatu un dà segnu di vita..."

Da, Italo Calvino, Se una notte d'inverno un viaggiatore. Einaudi, Torino, 1979

Fù cusì chi...

Fù cusì chi, custritti custretti, ghjuvanuteddi custumati, à i custeri di u fronti, funi purtati...

Lu trenu di Berlinu

O lu trenu di Berlinu,
Era carcu à brava ghjenta,
Ha pigliatu à l'umbarcia
Cu parecchji cuntigenti
Per noi simplici suldati
Fù u trenu tomba ghjenta.

D'appressu à Maria-Felice Marchetti, U trenu di Bastia v 1890.

Prima ligna

Sta mani aghju scrittu a mamma in paesi.
Mi sogu fattu cunnoscia ch'edda mi possi scriva. Un sogu s'edda t'ha capitu u senzu di stu scambiu di nomi, ma chi vuleti...
Lasciatu emi a guarnisoni par u focu in prima ligna.
À a gara, u doppu meziornu, cu l'indicazioni di a me cumpania, aghju trovu à Pitroni, a figliola e u figliolu. U tontu di Matteu ha fattu a dumanda par ingaghjassi.
Avà a vi possu dì, Mariastedda m'ha abbracciatu davanti à u babbu, ma u più beddu è, ch'un ha dettu nudda, u babbacciu ! Parlatu ha parlatu : "Aiò ziteddi chi ssi bosci l'avemi da sfrasciccà in pocchi ghjorni, a vi dicu eiu... E tralalera e tralalà !"
I treni erani carchi à omi : una sizzioni e ancu di più, in quiddi wagoni fatti par u bestiamu. Francescu pariva cuntenti. S'era buscu una buttiglietta di vinu chi i donni spartivani. In quidda mossa patriotica, ci vuliva ch'agnunu fessi qualcosa. Talmasca eddu era pinserosu. Aviva fattu a campagna à u Maroccu dui anni fà e un c'era cà eddu à cunnoscia a guerra vera e micca com'à noi quidda finta.
Ci vuliva senta i brioni. Un anzianettu di a guerra di u settanta, briaccu à paroddi bucciarava : "Vindetta, vindetta !" Era anch'eddu com'à tutti : A vindetta a si faciva cu u sangui prumissu di i ziteddi. È ghjusta st'affari cuì o nò ?
Noi altri, incatagnati in quiddi wagoni ghjuvericci à purtà, vacchi e cavaddi à u maceddu, erami cuì à mezu.
Mi dumandeti : Picchjarani i mazzeri, ancu di ghjornu ?
Unu, à cantu à me, ha dettu : "Deux semaines, il nous faut deux semaines et on est là pour les vendanges !".
Dui mesi, sì, dui mesi, o mirlacchjò !
À cinqui ori di sera u trenu si mossi. Pariva tuttu una sarpa insunnata chi si mittiva in marchja à scriva u distinu.

Mi manca (9)

Se tu sapessi tu, quantu mi manchi...

Bardamu

Un era micca quartiers-libres, ma guasgi. Figuretevi ch'edda è ghjunta Mariasteda à truvami, u ghjornu laccavani entra i famiglii.

Edda : "Vi vogliu suvità o Sarrà. Faraghju l'infirmiera, o d'altri cosi, se babbu è d'accunsentu."

"Maristedda, sapeti rifuitu, eiu, a guerra cu tuttu ciò chi c'è indrentu... Un la rigrettu micca... Un calu micca u capu... Un stogu micca à piigniculà nantu à edda... A rifiutu nettu, nettu, cù tutti l'omi ch'edda porta cun edda, un aghju nudda à fà cun eddi, nudda à fà ancun'edda. Fussini puru novi centu nuvanta cinqui millioni ed eiu, solu, solu, sò eddi chi t'hani u tortu, eddi, o Mariastè e sogu eiu à avè a raghjò, chi avà, saraghju solu à sapè ciò che vogliu : un vogliu più avè da mora.
- Ma, comu fà à rifiutadda, un è micca pussibuli, aiò o Sarrà ?! Un ci sò cà i tonti e i vigliacchi chi a  rifiutani, a guerra, quand'eddu ci voli à salvà a Patria d'un priculu maiò...
- Tandu, evviva i vigliacchi e i tonti e ch'eddi campani eddi, vigliacchi e tonti !
- V'arricordeti un nomi, Mariastedda, di quiddi chi sò morti à a guerra di Cent'anni ? Eti mai circatu à cunnoscia un nomi di quiddi ? Nò, navè ? Un eti mai circatu ?
- Un sapeti quali eddi sò, vi sò indifferenti ed in più scunnisciuti cà l'ultima particedda di stu pesu da tena i foglii che vò viditi cuì o cà di quiddu caccatu mattutinu vostru...
Viditi ch'eddi sò morti par nudda, Mariastedda ! Par nudda ssi scemi cuì ! A vi dicu eiu ! A prova è fatta ! Un è cà a vita chi conta.
Scumettiti chi, da cuì à deci mil'anni d'avali, sta guerra, tamanta ch'edda ci parghi oghji, sarà sminticata da tutti (...)
Eiu, o Mariastè, à l'avena, un ci crergu ..."*
L'aghju vistu parta amara, dilusa, ma ci semi prumissi di truvacci dumani à a gara, puvaretta.

*D'appressu à : Voyage au bout de la nuit, Louis-Ferdinand CELINE, p794, Baland éditeur 1966.

Fucileru di prima classa

A mani sò statu cunfirmatu tireur d'élite da u Capitanu Lannoy. M'ha cumplimintatu e m'ha datu (a vi dicu comu l'aghju intesa) : un cor de chasse de drap, un insegnu da cosgia nantu à manica manca di u me uniformi.
Comu aghju da dì in paesi quand'e mi ni vultaraghju ? Eru tiradori di prima trinca, bon' tiradori, fucileru di prima classa, tiradori di sceltu ?
Fucileru di prima classa, eccu ! Mi piaci : fucileru di prima classa.

Risposta

Fù a sò risposta, zifrata : Mariastedda.

Era cortu e longu u discorsu.

Tireur d'élite

Sta mani c'è statu à dinò un eserciziu di tiru.
Mi piaciva à me à manighjà fucili e affari cusigni. Era statu listessa, in Corsica, à u serviziu quandu eru à u suldatu.
Prima, stesi, ci vuliva à tuccà u segnu à centu metri. Agnunu aviva vinti colpi da tirà. Sogu statu eiu, u più bonu di a sizzioni cu Francescu u Pughjulanu.

Doppu c'è vulsutu, prima à zappà un fossu e doppu à tirà, sempri vinti cartuccii par omu, ma sta volta indinnuchjati. E cuì dinò sò statu eiu u più bravu, ma solu, sta volta :

Essendu di mira, u sargenti Talmasca mi dissi : "À partesi d'oghji o Barrulà, ti facciu passà tireur d'élite." 
Eru fieru chi, era più cà u simplici suldatu, era !

Da: Le Soldat de demain. Manuel militaire de la jeunesse française, à l'usage des sociétés de préparation militaire, sociétés de gymnastique. M. Imhaus et R. Chapelot, éditeurs (Paris), 1913

Source : Bibliothèque nationale de France, département Sciences et techniques, 8-V-36453

Citazioni 38

"Datteci masci, ni faremi suldati."
                          Generali Chanzy

Suldatu d'infantaria

Charles Camoin

Autoportrait en soldat, 1901, musée Granet, Aix-en-Provence

Da  : http://www.charles-camoin.com, i ringraziu.

Bigliettinu

Aghju scrittu un bigliettu :
Nous allons partir demain ou après-demain.
Si tu veux m'écrire, tu peux le faire. Mais ne me demande rien. 
Tu dois écrire à mon nom :
Soldat Antoine Marius Barrolaccia
141ème RI
3ème bataillon, 1er peloton.
Embrasse les tiens.
Sarratu fora

Eru primurosu di tuccadda, à Mariastedda, ma ci vuliva prima à truvà qualchi missagieru.
E cerca e cerca, quandu mi vensi l'idea di faddu passà par un certu Joseph Guiraud, mitragliori di u regimentu ch'aviva à sorta à veda a mamma malata e ch'aviva una permissioni di 2 ori. È statu d'accunsentu, l'aghju ringraziatu.

Fù cusì chi Mariastedda e i soi funi avertiti.

Casticatissimi annali di Marseglia.

Oghji era tempu d'ovri... e di manovri.
Emi marchjatu dui ore à ghjunghjà à Plan-de-Cuques e doppu avaremi passatu tre ori à fà a guerra finta (emi vintu noi, tiravami à polvara) !
À u tiru à u segnu, u veru stu colpu, agnunu t'aviva a sò tacca.
Culà aghju fattu cunniscienza cu un certu Francescu u Pughjulanu, quidd'altru corsu di a sizzioni. Era di segnu eddu. Ma un mi piacciva tantu cu u sò capu fattu à ovu e i sò strufuletti pieni à a bocca, certi volti cummandava ancu. Cummandava a meda biotta, sì.
Infini chi, cusì si passeti a ghjurnata.
 Parivami ziteddi in campu.
Parò a guerra, a vera, era stata edda, dicchjarata.

Speranza

Ghjesù Cristu d'occhji ci tena,
Ind'a speranza ci mantena*

*Austinu Agostini, Dite a vostra RCFM, 05-08-2014.

Sfilavami

A sei ori di sera, eru à u scagnu, libettu in manu à tuccà u me furbì (a dutazioni).
Fui virsatu ind'u 15esimu corpu (ben intesu), 29esima divisioni, 141esimu regimentu d'infantaria (quiddu di Marseglia), terzu battaglioni, terza cumpagnia, 1mu plitonu, 2nda sizzioni, squatra di un certu sargenti Talmasca.
A mani à sei ori sfilavami in fila, par ottu, ind'a caserna : "Un, deux. Un, deux...". 
Saremi stati cusì, una trintena, appenna di più.
O, ci vuliva à veda !

Middi dui centu sessanta setti

Matricula 1267, classa 1911.
Mi viniva mali à didda : "Matricule...  Midde... Mille dui centu... Mille deux cent sessanta.. Mille deux cent soixante sept ! Eccu, mille deux cent soixante sept. Classe 1911. Barrolaccia, Antoine, Marius."
Ci ha da vulè chi m'invenghi !

Matricula 1267

Fà chi un'ora doppu u nostru sargenti stava penna in manu, librettu novu, novu e stamponi in manu, prontu à scriva :
Eddu : "Classe de recrutement ?"
Eiu : "1911"
Eddu : "Numéro au registre : Umh, aghju da marcà  cum'edda mi veni : 1267... 15esima Regioni,
Classe de mobilisation", sempri eddu : Più anziana, 2nda riserva.
Bureau de recrutement : Marseille"
Nom et prénom, comu ti voli chjamà ?"
Eiu : ...
Tandu eddu : "Barrolaccia, Antoni, Mariu. Va bè ?"
Eiu : ...
Eddu : "Quandu è chi tu sè natu ?"
Eiu : "U 6 di sittembri 1891, ma, mamma..."
Eddu : "Un c'è ne mù, ne mà ! À.."
Eiu : "Comu à. À chini"?
Eddu : "À, veni à dì, induva è che tu sè natu ?"
Eiu : "Ind'i i Rossi."
Eddu, cuntentu : "Nè à : Rossi, è cusì u nomi di u paesi ? Sè Russaciu ?"
Eiu : "Russincu !"
Eddu : "Profession ?"
Eiu : "Sò natu pastori, in Sardegna aghju fattu u suvaru e cuì aghju fattu parecchji cosi à u portu."
Eddu : "Emi à metta "camalu", tandu ! Gradu ?"
Eiu : "Eru suldatu di prima classa."
Eddu : "Mi cunveni, domicile ?"
Eiu : "Stava cuì, in una casamata di u portu..."
Eddu : "Femi cusì, 6 quai de la Joliette, canton: Marseille, département: Bouches-du-Rhone. Andarà.
Ci semi ! Aiò o Barrulà, veni ancu megu à tuccà a tò dutazioni ti truvaremi un'affittazioni.
E zittu e muttu, mirè !"
In quattru e tre setti u me ghjaccaru di morsu m'aviva cacciatu d'imbarazzu !
Quiddu ghjornu si pò dì ch'eddu c'era un santu chi prigava par me, sapet. In più, m'hani datu una tabuletta di a cicculata !

Fascicule

Fà chi à meziornu passatu, mi truvedi spiccatu da i cunsignati quand'eddu vinsi à Bocchineru. Sta volta era eiu prontu à mursicaddu !
Mi dissi : "Vedi, o paisanò, i tipi culà (mi facciva veda i cunsignati) hani à tutti essa virsati ind'i battaglioni disciplinarii. Ancu assai chi...
Sogu chi fascicule un hai micca, hani à vena u doppu meziornu i giandarmi à circà u pelu ind'ovu à quiddi chi un hani micca.
Fascicule,eiu, ti n'aghju da fà unu. E cusì vinarè ind'a a meia, a cumpania, saremi tre corsi."
Comu e parchi avarà aghjittu cusì, quista un la sogu ?

Bocchineru

Induva andaremi à fà festa sta volta ?
Dui ghjorni ch'erami cuì senza nutizii ne nudda. Magnà, un ni parlemi.
A mani ch'e vi dicu mossimi à scopra venti, chi erami cuì e nun sappivami nudda, nudda di ciò chi si passava.
S'astri erani accupati à marchjà à u passu e noi erami cuì ad aspittà.
Vidii, tandu, un sargenti chi, à l'ingerma, mi pariva corsu.
Dissi, eiu, in corsu, apposta : "Scusatemi, o sargen' ? A vi possu fà una dumanda ? À chi ni semi ?"
U tipu passò tiratu, tiratu, fendu niccia d'un senta. Pò vultendusini, era prontu à inghjaccarami, cu u nodu di a massedda strintu.
E postu che nò semi à i ghjaccari, abbaghjò u sargenti : "Cu i dumandi, si và à Roma ! Un peu de respect soldat. Garde à vous !" U tuttu era statu dettu cu un accentu di quiddi, chi m'eti capitu... (E paffa ! L'omu era corsu ! Chi un m'eru sbagliatu, eiu.)
"Demi-tour. Reste avec les consignés ! Attends les ordres !"
C'era un tipu in paesi, t'aviva un ghjaccaracciu, Bocchineru, bavacciuloni, pariva tuttu eddu.
"Eh, toi le corsico, tu vois les soldats là-bas, ils sont de corvée de patates, va aider, vite."
A vi dicu, t'aviva, quistu, u gherbu di Bocchineru.
E mi truvedi intraccia di fà a corvée (Eru à u priparà d'un brodu: un ghjaddu par centinai d'omi...)
Aghju sappiutu doppu ch'eddu era un certu Talmasca di u Ghjunchettu.
Mi venara in manu quistu, mi vinarà.

A caserna di u Muy

Chi va à e nozzi

Chi va a e nozzi e un è invitatu, leva di bastonni in capu.

A notti l'emi passatu in tarra.

Aghju pinsatu à i nostri ammuntagneri ind'u Cacchjoni, durmivami cusì : una petra par cuscinu e u celi à cuperta, ghjenti cuttigna, mi. Si pò dì ch'erani beddi tempi tandu. Quantu erami ? Sariami stati sei o setti famiglii culand'su. A mani mugnivami e agnunu t'aviva a sò cuppa di latti, u sò pezzu di furmagliu e a sò civodda, ah bò, nò !