Cannunati fatali

Arisera m'aghju vistu à mamona, si scamulava. 

Chi segnu sarà statu ? 

Sugnavu.

A rivegu cu la sò faldetta, puvaretta, decisa quand'edda mi dava i sò cunsigli : 

"Caru meu, un ziffulà micca, chi di notti addetti i spiriti maligni, a t'aghju dighjà detta... Vai e vedi à Rosa chi t'ha da fà l'occhju... Quandi tu ti ni ricoddi in paesi, ghjuntu à l'Ortu à i Bugni lampa un "francu", à mezu à u ponti, ch'un si sà mai"... 

U panniolu di Santu Antoni e u brevi ch'edda m'aviva fattu... È longa a lista.

Era un antru tempu, era un antra vita. 

Calatu ch'eddu era u soli sappivami chi i cosi : petri, arburi ; l'essari, l'omi, avivani da scambià. A mani, u cantu di u ghjaddu, era tandu un antru tempu.

Oghji ? 

Pà i cannoni un c'è ne ghjornu ne notti, ziffulani listessu !

Oghji un è più u fiumi di i Tassi che nò t'avemi da varcà, oghji, persi in quidda campagna di "Champagna", è u fiumi di a Morti che nò t'avemi da varcà.

U Tinenti m'ha spiegatu, una sera una cosa straurdinaria : "que la terre tourne autour du soleil et que la lune tourne autour de la terre et que cela est prouvè, tu vois !"

Aghju pinsatu, tandu, à zia Maria di Sarafinu chi diciva un ghjornu à u sgiò Santiuniacci: "Ma un m'eti micca da dì chi sta luna, che vegu cuì (ind'i Petri Rossi), è a stessa cà quidda che vegu in Curtuli ?*"

Oghji era una antru tempu e sta guerra si tumbava omi, animali, luni (ch'erani parrechji), sperenze, e ci tumbava ancu i nostri proprii mazzeri e nostri credenzi, à buleghju... Guerra stirpatrici.

*Intesu da veru.

Cumbattimenti

Cumbattivami, scumbattiva.

Calinzana

Alzati lu me figliolu,

Alzati per un momentu,

Partisti di la tò casa,

Purta chjosa e foccu spentu,

Ma tutte le me sperenze,

Le s'ha parate lu ventu,

Ma nun senti la tò mamma,

Chi si tomba da lu pientu.

Maladì vogliu la guerra,

Vergogna di la natura,

Chi ne facci seccà l'erba,

Sfiurrusce l'arburatura,

Ma per me sta stittata

Nun sarà mai matura

Durarà caru di mamma

Sin'à chi stu cori dura.

Da: Calinzana, memoria d'un paese, Laurent Billard, Fr3 Via Stella, 2014.

Sbelu

Sintivu u sbelu di a mamma chi gridava à a Paci.

E pò mi vensini ssi paroddi :

"Vedi a bestia par la quali eiu mi volsi;

Parami da edda, o saviu famosu,

Ch'edda mi fà trimà e veni e i polsi."

Dante Alighieri, La Divina Commedia, Inferno, Cantu 01

Durà ?

Dicivani annu chi sta guerra un aviva micca da durà. 

Ma quantu tempu edda durarà una a guerra ?

Un ghjornu ? Un mesi ? Un annu ? Un seculu ?

Par i disgraziati, sapeti, a guerra dura un'eternità. 

Fussi edda l'eternità d'una stonda sola.

Abitu una firita sacra

Abitu una firita sacra

Abitu anziani imaginarii

Abitu uni scuru vulè

Abitu un longu silenziu

Abitu una seti persa

Abitu un viaghju di middi anni

Abitu una guerra di trecenti anni.

Moi laminaire. Aimé Césaire 1982

San Martinu

Dicivani :

"San Martinu, ch’eddu venga, incù a pala e u bacinu."

Digu eiu oghji :

"San Martinu, che tu venghi, sì, ancu a stoppa e cu l'ancinu,

à tappà canni e cannoni, à salvà truppa e fantacinu !

A stancià u sangui, vedi o San Martì, chi mi piglia u bambacinu !"

U carrò di a noci

Oh à risata arisera ! Stavami infrugnati com'à sempri ad aspittà chi qualchi bumbardamentu scupiissi da s'astri o da i nostri, quandi scupredi una noci.

Una noci salvata da i bombi, da i toppi e... da l'omi ! 

Oh a cuntintezza...

Ma u più beddu è statu a spartera :

Un quartu à mè, un quartu à Aubry, un quartu à Bechot e l'ultimu quartu à Stenz.

U tuttu, un era nudda. Parò stu u tuttu era stu mumentinu ed è stu poccu chi vi porta via, par una stundaredda.

Mon bien cher fils

I Petri Rosssi, 9 novembre 1915

Mon bien cher fils,

Voilà bien longtemps que nous ne recevons plus de nouvelles. Je suis inquiète.

Je dois d'abord t'annoncer la mort de notre cher instituteur, Monsieur Santiuniacci. 

Ton frère Jérôme après avoir reçu sa feuille de route à quitté la Corse ce 2 Novembre pour Antibes. Nous voilà donc seules avec ta soeur et la maison à tenir. 

Les récoltes n'ont pas été si mauvaises, la saison a été plutôt bonne. 

Mon cher fils, surtout ne te contrarie pas et tâche de nous écrire s'il te plait. C'est Monsieur Leandri le nouvel instituteur qui nous lira ta lettre.

Tu sais, ici le courrier apporte tellement de mauvaises nouvelles qu'une lettre de toi nous ferait plaisir.

Nous t'embrassons ta mère et ta soeur qui t'aiment tant.

Somb(r)e claire

Sogu l'r di guerra,

Sogu l'r di u tempu di l'ori,

Sogu l'r chi va aderra,

Sogu l'r di l'ori di li fiori,

Sogu l'r di l'ori di l'amori.

Sogu l'l di chera,

Sogu l'r di quella...

L'a di Spera.

16/18

3 di nuvembri 1915,

Fistighjavami i morti, fistighjavami i santi. I santi e i morti. Pinseti a festa !

Cimiteri e campi santi erani carchi e stracarchi. 

Cuì, culà.

In paesi a guerra si n'aviva purtatu diciottu. 

Diciottu ghjuvanuteddi : Paulu Ghjaseppu, Ghjuvani, Mariu di Dumenicu, Ghjaseppu di Francesca, Saveriu, Paulu di Paulu Antoni, Marcu di Marta, annu. Cust'annu : Agnulu di Marta u frateddu, Ghjuvani di Bartolu, Antoni di Santu, Carlu, Matteu, Paulu Francescu, Santu di Filippu, Paulu d'Antoni, Ghjiormu di Ghjuvani Maria, Filippu di Petru Paulu, Ranucciu di Vincenti.

Isie ni, diciottu in sedici mesi appena.

Culà, m'hani dettu ch'in paesi preti Cristofari aviva fattu sarrà l'arca dui anni fà. Megliu fariani à riapra la e ancu à alargadda, sì.

Cuì, un erani micca archi ch'eddu ci vuliva appruntà, erani i porti di l'Infernu ch'eddu ci vuliva à apri. Apra e tenali spalancati, ch'intravani in grossu !!! 

O Signori, se vò pudeti, fetti ch'eddi s'imprunichessini sti porti di l'Infernu e par sempri !

Jean-Michel Basquiat, Scull – da : wikiart.org (ditagliu)

Cenara nera

Litturali di doppu battaglia

Spazii rosi, truppi sfrascicati

contru à i biadi, farri 

tronchi, cotri trà a brina e i petri,

luna aspra.

Luna di ghjumenta firita, catusciata,

Aguttuppata à spini stanchi, minaciosa, ossu

o metalu annigatu, assenza, panni amari,

nebbia di ligramanti.

Darretu l'acru nimbu di nitratu,

di sustenza in sustenza, di vadina in vadina,

Vivi quantu è u granu sgranidatu

brusgiati e rosi.

Scorzi di azardu suvali, suvali,

Cenara nera chi manca, spulata,

È tempu avali di fretti vibranti, spavintosi,

matiriali di piuviti.

Chi i me ghjinocchji u tenissini intarratu

ancu più chi sta cuntrata fugaci,

E chi i me pennuli l'aguantessini insinu à insignà e feriscia,

E chi u me sangui tinissi stu sapori d'ombra

Ch'eddu un ci sighi diminticanza.

Pablo Neruda, Residencia en la tierra

Pali furcuti

Stavami à l'arrière à unipocchi di chilometri di i primi ligni.

Passavani l'ori in quiddi barrachi induva tuttu pariva organizatu : a suppa a mani, à mezziornu, suppa cù u pani, a sera suppa cù u pani e cù un speziu di furmagliu chi i me cumpagni chjamavani "caucciù", o qualcosa cusigna. 

Par mintena i nostri bardà for' d'acqua l'appicavami à certi pali furcuti chi u génie ci aviva instalatu. Pali e barrachi : una vera villa di miseria.

Pinsendu à quiddi "villi miserii" (forchi, stuviglii, piloni e ghjamboni...), mi vinsi in menti u stazzili d'Asprettu induva stava zia Filiciola, sempri a prima à mani à u marcatu d'Aghjacciu !

L'istatina, Zia Filiciola si piattava da u soli, pusata à u pedu d'unu di sti pali, carcu e stracarcu.
Straziavami cuì e culà, era a nostra sorti, cuisgna.
Strazià, magnà, mora : "e poi murir !" diciva Giordano, un garzonu ch'era passatu ind'i Petri Rossi qualchi anni fà.

F. Corbellini

Pater noster

Piuvivani i bombi.

Noi prigavami. 

Eiu, sicondu à preti Cristofari :

Padre nostru chi steti in celu,

Santificatu sia u vostru nomi,

Ch'eddu venga u vostru regnu,

Sia fatta a vostra Divina Vulintà,

In tarra cume in celu,

Dattecci oghji u pani d'ogni ghjornu

E rimettitecci i nostri debiti,

Cume noi i rimittimi à i nostri debbitori,

Nun ci lacheti cascà ind'a tintazioni

E pareteci da u mali.

(Parchi, è vostru u regnu, a putenza e a gloria, in secula, seculorum).

Amen

Quanti volti l'avaraghju dettu sta prighera ? 

Centu volti ? Middi ? Centu middi e middicentu e middi !

Zuccutti di frettu

21 d'uttrovi 1915

Stavami cuì à varda i canteddi infusi. L'acqua minuta m'attravirsava a peddi insin'à i carri prufondi. Acqua minuta, nun sei criduta... e tronchi l'ossi ?

Ma eiu, ti crergu, va.

Tre ghjorni che nò vardavami una ligna muta. Muta d'omi, di guerrieri e muta di vita e muta d'adori di polvara : una ligna muta, muta di tuttu.

I zuccutti di frettu annunziavani a frebba, sigura.

Paisacciu !

À me mi mancava... u ziglioni. Alora, pinseti !

E noi, aspitavami.

Paisacciu !

Charles Milcendeau, Musèe municipal La Roche sur Yon

http://www.culture.gouv.fr/documentation/joconde/fr/pres.htm 

Sans changement

18 d'uttrovi 1915

Nuvesimu ghjornu à l'arrière au camp de la Noblette. I ghjorni passavani "sans changement", agna tantu un bumbardamentu, u tempu di lampassi ind'i boyaux ind'a furesta vicina. À l'ori caldi, i grossi pezzi alimani circavani à tirà nantu à u campu d'aviaziò cuì, accantu.

Se u colpu è troppu cortu tandu è par noi, e ci lampemi in un Patri e Figliu, sottu tarra.

Culà ci sò parecchji aviò. Ci n'è unu, aviò, rossu, rossu, cundutu da un certu Jò Tricant, un assu, scaviatu, mustacci dritti, sempri u surisu in bocca.

Ci voli à veda st'aviò cuddà in celi comu u fariani l'aceddi i più arditi. 

Aò, un mondu si ni mori e un mondu nuveddu nasci davanti à noi. (Avivu da andà, eiu, à spiegà à zi Marmazzu ch'un omu si porta in arii e vola... Come vuleti ch'in capu vecchju, induva nun ci entra a tigna, aviva da entra, massimu, un aviò, oh a, navè ?).

Moriamur inermes

"O genitor, si nota tibi divina voluntas, 

Sique [ tibi ante oculos venturum est cernere tempus, 

Scire velim [ quid Fata parent. Nam bella videmus

Aspera terribili Latium qu [ assantia motu.

Hanibal in foribus stat perfidus. Omnia retro

Versa cadunt. Nostro pinguescunt arua crurore.

Tot clari cecidere duces. Vos lumina tanti

Imperii tam magna duo cecidisti eodem

Tempore. Tunc Italis raptus regionibus est sol,

Magnaque sub gemina nutavit Roma riuna.

Quid superest ? dominam quis nunc manet exitus Urbem ?

Corruet, an stabit ? Quod si frusta arma movemus,

Exime tot curas animo tantosque labores : 

Somnum redde oculis et menbris redde quietem.

(...)

Moriamur inermes !

Francescu Petrarca, Affrica, Liber secundus 13-30, 

"O genitò, se tu cunnosci a divina vulintà e postu che tu vedi passà l'avveni davanti à li tò occhji, chi ci para a Sorti (quid Fata parent)? Avà vidimi guerri tarribuli chi fani trimà u Laziu. Annibali perfidu sta fora à a porta. Tuttu è à u ritrosu e prestu si n'ha da cascà. U nostru sangui ingrassa i nostri araturi. Tanti capi illustri hani cidutu. Voi, dui, lumi d'un imperu tamantu (tam magna), cedesti ad un tempu. U soli fù rapitu à i rughjoni d'Italia. Roma maiora zinculiava sottu à sta doppia ruvina. Ch'arresta ? E chi sarà a fini chi aspetta Roma, Urbs suprana. 

Currota o stà ? 

Muvimi l'armi in vannu, caccieti a me anima à tanti sforzi e tanti peni. Rendi u sonnu à li me occhji e rendi i membri miei quieti.

(...)

Muressimi disarmati, (inarmati) !

Pastori e muntoni

À quali cuntà sti fatti, sti fabii ?

Sta mani, u soli s'era truvatu un tavunceddu da pudè fà l'arrucchjata di u pastori.

Oghji, u Pastori un pudiva essa cà qualchi generali persu ind'i sò alti funzioni, luntanu da i sò pasciali.

I muntoni, pronti pà u maceddu, i faccivami noi: bè, bè, bè !

Fabia

De nobis fabula narratur (di noi sta fabia è a narrazioni...).

Da : http://centenaire-14-18.ecpad.fr

A manu nera

Pariva tuttu ch'edda suffiessi agna tantu .

Intrampalava tecchja di sangui, s'affacindava à straccià i carri cotti e corroti di u bracciu di u mortu chi si tiniva davant'à noi. L'omu, un certu Germain, era statu sepulitu arimani da un tiru di cannoni, un arristava più cà una manu nera aparta chi pariva fà a limosina, fora da un munticeddu di tarra, fattu d'avà. Di fatti un arristava più à Germain cà à coglia l'acqua (chi aviva piuvitu poccu innanzu). 

Ma nimu passava.

Eiu, mi tinivu à l'agrotu, sottu à una tola, pusatu nantu à una panca secca, di puntu à stu bracciu e fighjulavu sta mosca zuffuta : picchjava a pedi, a stracciava, sghingnava di denti e facciva, comu s'edda aviva da magnà, purtendu i sò dui spadetti in bocca : mecanica cumpiita.

Si liccava, li cacciva a carri e si liccava e stracciva. Era sola, ingorda, à roda stu pezzu di ciò chi era statu un umanu oramai turratu tarra o piuttostu carritarra o tarracarri, come vò vuleti.

A mosca, si licava imbriaccata di u succhju neru sgutattu di ciò ch'arristava di Germain. 

E pò stinzava u coddu, ti fighjulava insinsata, li carrizzava a pedi di culu e a pungniva da metta i sò varmi.

Pinsavu à i nostri detti antichi, mi dumandava s'eddi erani ghjuvatoghji par i moschi ? 

Sapeti tutti i : "Crisciti e multiplicheti e che vò scaccieti tutti i piccati chi sò nantu à sta terra. Che Diu vi pruteghji !" 

Ci avaraghju passatu a ghjurnata intera à fighjulà sta mosca di Germain. 

Pecuramosca bianca, pecuramosca nera dite a vostra chi a meia è... à stintinera. 

Induva caccacarani i moschi ?

Da intuntiscia...

Sguardu

Aujourd'ui j'ai reçu une carte de Marseille ! (mi dumandu com'avarani fatti à truvami...).
Stani tutti bè culà.

Una carta cusigna ti leva agna primura pà a ghjurnata.
J'ai cru me voir en songe le sguarde, le-sguarde-deux (insistu), de Mariastedda ("u sguardu" è "le...", "le..." Uffa, oh !!! S'assumiglia a parodda, ma un è micca listessa. Le, u... Resguarde ! Basta, un mi veni micca !).
M'è parsu d'ave vistu u sguardu di Mariastedda eccu, capisciarè cusì (m'annarbu).

Di i Petri Rossi mancu una nutizia, comu sarà ?

Cara musa

O povari morti !

A vostra boci è chjusa,

Oramai mai più nun fareti senta rumori,

Persa si è a vostra tinta musa,

Urfanedda di voi, sta sera, si ni mori.

E sintareti sdrughjasi ' vostra anima cuntusa.

Sò passati par cuì ci, middi, middi e middi milizii d'accacciatori.

I morti un parlani micca, a natura è cunfusa,

E tandu pianu, pianu s'empii u silenziu di tutti i nostri notti e di tutti i nostri albori.

               Georges P Leroux. Aux Eparges, soldats enterrant leurs camarades au claire de lune, 1915, (ditagliu)

      © Photo RMN-Grand Palais - G. Blot

I tre zii

Zi Papiolu si ni stava solu in casa. 

Parò in piazza, ind'a casa vicina stavani Zia Zeppa di Mincarettu (di i Lamberti) e Zia Lalola, a cugnata. Zeppa cu Papiolu erani cuccini carnali par via di a tinta di Mariola, a mamma di Papiolu, suredda di Zi Mincarettu. 

Zia Lalola era fantina in carica di i faccendi di fora, andava à a funtana gera in capu. A l'albori cuddava à turrà l'acqua par u sò orticeddu. Partiva à lavà i panni d'istatina e budeddi, à Natali, ind'u fiumi di i Mulini. À fà i cimi ind'i Nuvaleddi, pà scaldà u forru di u sabatu. Lalola battiva a campagna. Si cuntintava.

Zia Zeppa edda s'era didicata à a sò maritu, Santu Vatera, mortu ghjovanu, e à sò casa. Santu a si era lacata sola senza mancu un ziteddu. Si saria rimaritata ma u tontu di Saveriu, u frateddu maiori, chi era ind'i culunii, eddu un vuliva. S'era rimissa tandu à u sò arbitriu e cusì, steti sola u restu di a vita. A facciva à disgrazia, ma a facciva.

Ancu assai ch'eddu c'era à Lalola !

"Binedetu à chi lascia i soi ind'u benistà e senza figlioli à piegnalu." diciva un pruverbiu, ma par Zeppa era tortu quiddu chi l'aviva invantatu quistu. Zia Zeppa sappiva fà tuttu da par edda, era donna di casa com'eddu si dici. In piazza calzitava o filava a sò roca.

A sò vita era u veru cumpendiu di miserii e di tribulazioni ma c'era Papiolu chi tal'à u stantaru stava e ristava e certi volti à facci rida.

Lalola purtava u dolu di u frateddu, Zeppa quiddu di u maritu : un mortu solu, parecchji doli.

Si ne mori u Rè

"Da chi saraghju natu eiu, s'eddu un è micca par sempri ?" Si dumandava un certu Eugène chi stava in fiancu à mè. "Sei natu ancu tù da pattiscia sta stonda chi ti farà ammetta che tu pò mora ancu tu, com'à l'altri." Puntu e basta, a primura s'eddu si ni mora u rè o u vescu...

Tardi Verney, Putain de guerre, Casterman, 2014

Zi Papiolu

Andeti voi à sapè ma aghju sunniatu di Zi Papiolu...

Zi Papiolu u Cortulesu, sappeti.

Durmivu tra dui canteddi trosci aspitendu qualchi ordini seccu, i cosi com'eddi vi venani ?!

U ghjornu sunniavu e Zi Papiolu (era di Cortuli un paisolu vicinu à i Petri Rossi) stava com'à sempri à pipa in bocca pusatu, in piazza, davanti à sò porta. 

Misteriosu pariva ch'eddu purtessi tutti i sigretti di stu mondu da par eddu: stancu e pisanti, pusava, Zi Papiolu, passivu e pinserosu : cugliva u ventu.

À mè mi gerbava l'idea di pudè cuddà mi ne à truvaddu sempi cuì. E pò, un ghjornu senza dì nudda à nimu, si n'è andatu Zi Papiolu. Si n'è andatu senza dì nimu à nudda.

Induva sarà andatu ? Misteru ?!

U si sarà purtatu u ventu...

Mi svegliedi.

Apri miseria, apri

Alora à mezzu à tutti sti miserii, sti scumpienti, pinsedi à ssa puesia Taliana che u sgiò Santuniacci m'aviva dattu. A digu com'edda m'è ristata :

Chjudesti i lumi, Armida : u celi avaru,
Invidiò u cunfortu à i tò martiri,
Apri, miseria, apri l'occhji; piantu amaru,
Ind'occhji à u tò numicu,
Hor' che vedi, tu, che nun miri ?
Oh, se udir' tu potessi ! Oh com'è caru
T'addulciria u sonu di i sò suspiri !
Ti dà quantu eddu pò, e prendi

E tu nun vedi,
Pietosu in vista, 

Tu nun credi
L'ultimi licenzi.

Il Tasso, Gerusaleme liberata, LX.

Oghji

"Riposu e teoria. Accuncemi u bivuacu fendu stradeddi tra i rangati di i tenditi. Una corvea parta à coglia, pò à faddi coccia, meli, par tutta a cumpania. À quatr'ori u doppu meziornu, cannunata maiò di punta à noi (...) Semi à 6 chilometri da i ligni e cuì, semi beddi siguri. Frettu e fumaccia."*

Cù : http://rosalielebel75.franceserv.com

*Cù : http://www.nrblog.fr/centenaire-14-18, à ringraziaddi.

Tu, in altri curi...

O, "Vulariu che tu vinissi ind'a me una sera d'inguernu stretti insemi darretu à i vetri, à fighjulà a solitudini di i stradi bughji e cutrati, e che nò ci ricordessimi l'inguerni di i favuli, induva vissimi insemi senza mancu sapedda.

E par li stessi stradi fatati passetimi infatti eiu e tè, à passi timidi, tremindui andetimi trà furesti pieni à lupi e à i genii chi spiavani da ciuffi di murzu suspesi à i torri mezu à vulati di corbi.

(...) 

Ma tu – oramai mi n'invengu – nun cunosci i favuli antichi di i rè senza nomi, di l'orchi e i di l'orti stregati (...) Darretu à i vetri, ind'a sera d’inguernu, à u tantu noi staremi muti, eiu à perdammi ind'i favuli morti, tu in altri curi da me scunnusciuti. Tandu eiu dumandaraghju : “Ti n'inveni ?” Ma tu, nun ti n'inviniria micca."*

Ti vulivu dì "ti tengu cara", e mi svigliedi ind'a cianga eterna di lu nostru nereternu destinu e scunsulati.

*Dino Buzzati, Gli inviti superflui.

Sogni

Erami stanchi di fatica e quandu u sognu era cattivu, era tandu chi era a realtà vera accadiva.

Frassetu

Avivu trovu à Renè chi si tiniva capicalatu nantu à un canteddu di a tranchée. Pariva paralizatu. Aghju fattu par passà, l'aghju appena toccu e m'è vinutu in bracciu, era mortu. A badda aviva picchjatu cuì, sottu à l'arrechja dritta par risorta à manca caccienduli sta mittà di a faccia.

Puvarettu.

E pinsavu, eiu, ch'eddu durmiva ! 

Quali era u culpevuli ? Ranuccieddu, micca. U Bosciu ? Manc'eddu. Erani sti capizzoni tecchji, si, chi si tichjavani, si tichjavani ! 

Tandu mi sò vinutu in menti sti pocchi paroddi d'una prigantula imparata pocchi anni innanzu ini strada quandu eru in partanza pà a Sardegna :

Ô mamma, ô mamma,

Un possu più pardunà

Chi sta ghjenti false e rive

Carità nuni possu più fà !*

*Stratu da u brevi di Sant'Antoni di Frassetu

Stantatu di sangui

Era una guerra accanita. Agna metru valiva 100 omi, certi volti ancu di più, massimu pà i primi ligni, suventi battaglioni neri. 

Veni vinendu, un valivami nudda. 

Sò l'armati, ne mancu i generali chi nun morani mai. Erani eddi i maestri di u ghjoccu, faccivami i mariunetti. Invitus, invitam.

Erami partuti par un mesi, oghji aghju capitu ch'edda aviva da durà. Agnunu spianava l'altru in lu sò sensu. Un colpu eddi, un colpu noi.

Sta guerra era ingorda di corpi e magnava u sò stantatu, u ghjornu, a notti. 

Era una setti intichjivuli di u sò stantatu di sangui d'ogni ghjornu, d'ogni notti.

Avivami da sparta cù a pedimozza, era u nostru destinu cusì.

Sò l'Armati chi nun morani mai

E pò i tempi sò vinuti si sò aparti i fossi

I finzioni di i Schiavi sempri trimulenti

Si sò alzati gridendu : iò, SANGUI À I TUDESCHI

Noi, l'armata ch'un si pò veda, nostri gridi accichenti

Più dolci chi u meli un pò essa e più frustu chi un pugnu di tarra

Ti vultemi i spaddi Italia dulcimenti

Ma un ti ni fà chi ti tenimi cara

Italia madre sei ancu figliola nostra

Stemi cuì tranquiddi senza tristezza

E se, malgrattu i maschi, i sacchi pieni à rena, i palanchi, noi caschemi,

Ch'un antru tinarà u postu nostru quista pò a sappemi

Sò l'Armati chi nun morani mai.

Or' nun sò longhi li mesi ne i ghjorni ne i notti

È a guerra chi dura.

Da G Appolinaire Calligrammes

29 di sittembri 1915

Il pleut.

75

St'ultimi ghjorni l'artiglieria di campagna picchja forti. 

Ci voli à senta i nostri cannoni di 75 e l'artiglieria di i tranchées chi cercani à strappà i primi ligni numichi e a spiantà i reti di barbelés, i sò ligni d'appruvistamentu e i nodi di communicazioni.

Darretu à noi ci vuliva à veda : cunstruivani camini di farru, stradi da purtà armi, omi, munizioni à tonni. A notti era à ghjornu, u ghjornu era à notti : Era un mondu svultulatu.

Ed è subito sera

Agnunu sta solu sopra à u cori di a tarra,

Trafuratu da un raggiu di soli ;

Ed è subitu sera.

S Quasimodo

Cù 

http://restaurars.altervista.org 

à ringraziaddi

Champ de carnage

Mi truvedi a sera sempri ind'a carciara di u nutariu cù un certu René e d'altri. Stu René, facciva u panateru à Bussy-en-Hothe o qualcosa cusigna ? Scriviva à u frateddu. M'ha dettu: "Tiens le corsico, qu'est que t'en penses. Marre, je balance tout."

Era faticatu e lessi à lumi di candela :

 "(...) Une odeur effroyable, une odeur de charnier, monte de toute cette pourriture. Elle nous prend à la gorge, et pendant quatre heures elle ne nous abandonnera pas. Au moments où je trace ces lignes je la sens encore éparse autour de moi qui me fait chavirer le cœur. En vain le vent soufflant en rafales sur la plaine s'efforcait-t-il de balayer tout cela : il arrivait à chasser les tourbillons de fumée qui s'élevaient de tous ces tas brûlants; mais il n'arrivait pas à chasser l'odeur de la mort. "Champs de bataille", ai-je dit plus haut. Non, pas champs de bataille, mais champ de carnage. Car les cadavres ce n'est rien. En ce moment, j'ai deja oubliè leurs centaines de figures grimacantes et leurs attitudes contorsionnées. Mais ce que je n'oublierai jamais, c'est la ruine des choses, c'est le saccage abominable des chaumières, c'est le pillage des maisons..."*

Avivu da scriva cusì in paesi, à mamma ? À me frateddu prontu à parta anch'eddu ? Ah, ò, un pudivu, eiu. Certi volti è megliu à un dì nudda ancu puru s'edda è à taci a verità vera. Un si facci micca, nò ? Mamma, "è dentru la tua grazia che nasci la mia angoscia".**

*Paroles de Poilus, sous la direction de JP Guéno, p 51, Librio, 1998.

** PP Pasolini.

Asindetu di me

"I grundaghji, u ventu, l'arba, i casci secci, a puzza, u sangui, a cianga, i topi, i varmi, i moschi succhjosi, u salnitru, a tarra, oramai faccivani parti di me. Pezzi veri di u me essaru stessu. "

I "boyaux" di Neuville 2

Sangui-cianghi

Da l'Illustration, Argonne 1915

I "boyaux"* di Neuville-Saint-Vaast

Neuville-Saint-Vaast un era cà una maceria oramai. 

A sezioni nostra fù albergata ind'a carciara di a casa di u nutariu. Tutti quiddi chi sò passati par Neuville a cunnosciani bè; umidu, acqua e bughju, piena à rumenzula, ghjetti di tuttu chi ti cacciva un fumi ch'impistava. Cù li nostri farri à manu, agnunu ci si feci u sò littami dà pudè stassini stessi e arripusassi da sta pruminata di dodici ori à u mancu in quiddi "boyaux" (...)

À quattr'ori e mezu u doppu mezionu, l'ufficiali ghjunsini e ci fecini appruntà u bardà e deci minuti doppu, passendu par trè boyaux diversi u regimenti cuddò francu e lestru versu à Farbus da induva avivami dà sbuccà in tromba cù, à dritta e a manca, l'altri regimenti di a divisioni.

Ma, appena cinqui centu metri passati, ci arrestedimi par un pezzu. Ma comu sarà ? À un cruciamenti di boyaux induva erami arrivati, sia troppu in freccia, sia troppu tardi, ci vuliva à fà passà un battaglioni interu di u regimenti nostru.

Ripartedimi guasgi currendu e pò ci truvedimi arristati à dinò e rinculedimi ancu à ghjugna à accatastassi in un boyau tappatu da fà passà certi unità ch'avivani da essa rilivati. Fù cusigna par parrecchji ori : ci facivani avanzà, piantà, era rinculi e partuti. A notti era pagna, piuviva, l'acqua falava à paghjulati, erami trosci, bagnati, sculisciavami, inciampavami in quiddi boyaux pieni à cianga. Anh, ah ! erami beddi par andà à l'assalti di stu binidettu Farbus.

D'un colpu trasaltedimi. Una fuculiccia viva schiattò di fronti à noi, sintedimi mughji, omi chi chjamavani, ma chi c'era ? 

Infini, erami ghjunti in Farbus, o nò ?

Mancu ! 

C'era chi a 23 esima cumpania chi ci andava di nanzu aviva suparatu i nostri posti senza rendasi ne contu e s'infattò una transcea alimana e fù ricivuta da una sparata maiò (...) 

L'omi di a 23 esima si piattedini in tarra da laccà passà i raffichi di mittragliosi e scappedini in furia purtendu cunfusioni in tuttu u regimentu. Ci fù, firiti e morti in quidda cumpania. 

À mezanotti, a nostra cumpania si truvò in una transcea svultulata, i rifugi, puru fondi ch'eddi fussinu, erani spiantati; era a prima ligna alimana chi i truppi nostri avivani presu u 25 di sittembri**, ed è cuì che nò finiscimi a notti.

À u fà di u ghjornu, ci avvinimi chi c'erani centinai di morti francesi : ligni, fili interi di tiragliori erani stati sigati. Era statu u prezzu à pagà par fà quattru o cinqui centu metri, una vita umana à u metru quadratu, à poccu pressu. Ah ! Pudivani cantà vittoria,  i nostri communicati. Ch'eddi un l'avissini stampati cù u sò quattru neru !

*(Avivami zappati galerie, tranchées di communicazioni, erami turrati spesii di topi lucignuli...)

**1915

Da, Les carnets de guerre de Louis Barthas, tonnelier, 1914-1918, p 175 e seg., Edition du centenaire, La Decouverte, 2013.

Scriva

"Minhas mãos ainda estão molhadas do azul das ondas entreabertas, e a cor que escorre de meus dedos colore as areias desertas."*

Cecília Meireles

*I me mani stani sempri umidogni da l'azuru di l'ondi mez'aparti, ed u colori chi scorri da i me ditti culorisci à la rena deserta.

(Da leghja, A Giandarmaria di Sarri e d'altri...)

Tarra primurdiali

"Si capisci, l'affari pigliani un gattivu piegu, sarii mossu e quandu a strinta di u mondu saria divintata troppu putenti, ti ni sarii vultatu in casa.

Ma un è andatu cusì, chi i cosi pigliani un gattivu piegu, in modu misteriosu e crudeli di i cosi, chi spezzani contra di eddi tutti l'illusioni di chjara cuscienza. 

Sei partutu e lu mondu, eddu, nun ti ha strintu (...) e più nun vedi davanti à te cà tarra primurdiali."

Dapressu à Un Dieu un animal, Jérôme Ferrari, Actes Sud 2012

Pinsà

"Frustra egomet mecum has rationes puto."

Publius Tarenziu Afer (Adelphoe, i frateddi, 208)

Incantu verdi

Ghjacciani numarosi i morti indi i prati, 

Stesi nantu à i fiori o stesi indi i fossi,

Armi persi, ragi di rotti sfasciatti,

I canoni d'acciaghju stani lampati in tarra.

Puzzateddi di sangui diffondini vapori,

Rossu e neru si sparghjani par ssi stradi,

Cavaddi morti cù li sò civi aparti

Anchi tirati, toccu à ssu primu albori

E indi u ventu frescu, cottrani e lacrimi 

Di i mezi morti, e u livanti piglia i sò culor'

D'un lumi sbiacculatu, incantu verdi

Una frisgia stretta, stretta di un fugaci Albor'

Georg Heym

It seems that destiny has taken a hand.

Sommesous

Sommesous,

Paisolu

ind'a Marna

Chi u martiriu

Incarna.

Cù la tò esgia brusgiata,

Li tò stradi sfundati,

Cù tutti i tò refugiati,

E tò casi spiantati.

Viaghju dulurosu*

U viaghju fù cortu : Dijon-Langres, (passaghju par Troyes)- Richebourg-Chateauvillain-Saint Aventin-Troyes (cuì, scambiemi di trennu), Acis sur Aube-Sommesous :"Tout le monde descend !".

Da Sommesous à ghjunghja à Coole ci avaremi missu 3 ori, o mancu ? Nimu un ci aspittava cà un giandarmu à abbaghjà :"Toi, tes papiers. Mets toi là, tu rejoins la cantonnement du 171 eme à Coole, la colonne se forme là, suis les. Suivant, toi..."

Arrivati in Bettelemi

Passarà lu nostru affanu,

Parchi certu cun voi insemi,

À noi tutti ci ricivaranni,

Ci aghju tanti parenti

Bon'amichi e cuniscenti*

*Da un cantu tradiziunali Sicilianu.

Fiffina

O zia Fiffì, vi n'inviniti quand'e vò seti cuddata scalza da i Petri Rossi à ghjunghja in Casamaccioli, pà a Santa ?

C'erami tutti. 

O chi campazioni. 

Era un antru tempu, un antru mondu.

Ghjuccavami, ci cunfruntavami in puesia, à mora, à i carti.

Prigavami a Madonna in prucessiò (t'ha un nomi particulari culà, ma, à didda franca, un mi n'invengu mancu più).

A sera u preti fecci benedizioni (a mani m'eru vindutu à Corsa e u lindumani cumpravu à un macchignò Bastiacciu, un antra mula Orrezinca, chjamata Turca, più ghjovana e farrata -quissu che vi digu, a "china", a chjama a "pesca di benefizienza", agnunu ha u sò parlà... ma i bastiacci, pò !)

In più, una sunagliera nova cù coddi di volpi e i sò fiocchi rossi à l'occhjaturi, chi mi piaceni tantu. 

M'eru tinnutu u me imbastu abbracciatu, s'aghjustava.

Oghji chi m'arresta ? Più nudda cà a prighera, chi i cunfronti cuì baddani d'un'antra manera...

Vi n'inviniti, o zia Fiffina? Prigavami a Santa.

120

Salmu 120

1. Ind'a calamità mea, chjamu à l’Eternu e m'esaudisci.

2. O Signori, libera l'anima mea da a bocca buciarda, da a lingua ch'inganna !

3. Chi ti hani da dà e di chi fruttu saria, una lingua ch'inganna ?

7. Eiu, sogu da a paci; ma à tempu chi parlu, eddi sò pà a guerra.

Cusì dici a Santa Scrittura.

Abbrucà

"Incindieti, incindieti, dati focu à a tarra ch'edda diventi un soli.

Scompii, sfrascica, distrughi, passa, passa, o beddissimu flagellu umanu, sii pesta, trabulamentu, timpesta.

Fà chi una primavera rossa di sangui e di martiriu,

Sbuccia da questa vecchja tarra, e chi a vita sia com'è una fiara.

Viva a guerra !"

C. Govoni, Guerra ! 1915

U Vinachesu di Langres

à Ph M

U trennu colmu ci cuddava versu u fronti e s'arristò ind'a gara di Langra (Langres) chi s'era resa a lucumutiva sgangherata.

Passendu nantu à u quai sintedimi i quaquaquà d'una piccula banda : sunnavani in lingua nostra !

Ci n'era unu, pulindonu Vinachesu, l'aghju sappiuta doppu, capirossu, sargenti di a 132 sta volta à a manovra di i "di-quali-e-di-d-induva ?"

Addirizendussi à u più ghjovanu abbaghjò:

"E tù quali sei ?"

"Jeannot, Jeannot Pasturelli di a Leccica !" (Quistu t'aviva tuttu di u macu parighjinu, un si sappiva s'eddu a facciva apposta o s'eddu era qualchi pastori spasturatu e chi firmava sempri malavviatu !!!)

E pò, in uni scorru ci n'era un antru, murriciu.

E tu d'induva sei ?

Ha sciaccatu quiddu :"Mi chjamu Crisistofoli Atanasiu, Carghjesianu, Grecu di razzinu, Corsu di nascita, Ghjenuvesi di cori e Francesu chi a Corsica era stata accupata, navè ?*"

"E tù chi un dici nudda di quali ne sei ?" : 

Tandu aghju dettu eiu : "Capurali Barrolaccia dettu, Sarratu, Sarratu fora di i Petri Rossi di u 171 esimu."

"Umbè, quistu u nomi !" Dissi u capirossu.

Era, sapeti, a curiosità paisana, pasturina, mischiata d'affezioni; ch'o sinò, u prusperosu ..! Tuttu què, manc'à dì, à mezu à stu muvimenti di ghjenti chi, m'eti capitu...

Lintedi :"Ogni aceddu canta u sò nomi, sapeti." Pinsendu in tra me stessu :  "Vinachesi, pomi e fasgioli, fasgioli e pomi. Setti tutti listessi."

*D'apressu à America America, filmu d'E Kazan, 1963 :"Mi chjamu Elia Kazan, Grecu di razzinu, Turcu di nascita, Americanu chi ziu ha fattu un viaghju."

Lionel Walden

Kobane nera Signora

Aghju vistu, oghji, a fini d'un zittedducciu. 

U trenu rulava, ci purtava à u fronti.

Triste spondi.

Quali è ch'ha da rispondi ?

Nimu.

S'è ruvinata l'umanità intera.

Povaru fantineddu caru, povar'à noi.

A Signora vistuta di nera,

Ha vintu edda sta sera.

Aghju vistu, oghji, a fini d'un zittedducciu.