U piloni

Spinta era a ziglia e frantu lu piloni ! Dici u dettu.

U doppu mezziornu sogu andatu à veda à zia Muntò. E l'ultima, oghji, in paesi à sapè travaglià u pannu corsu com'eddu ci voli. Zia muntò t'ha à casa fora di u paesi. Stà ind'i Poghji e travaglia par l'altri. T'ha u sò tilaghju e sò parecchji i pastori di u paesi à purtà a lana culà (sarà parquista ch'edda si chjama cusigna).
Quandu edda m'ha vistu in piazza, m'ha subitu dettu : " O Sarrà, t'aghju aspitatu, sà! Sapivu che tu aviva da vena à cummandami un piloni novu. E calpighjatu bè, un è ?".
Ssi donni, quantunqua, quant'eddi ni sani... Pò à l'aghju dettu à a vecchja : " O zì, truvetimi à cosgiami stu filu rossu nantu à stu piloni, fettimi stu piacè ".
"Sigura o Sarrà, t'avarè i tò idei. Agnunu t'ha u sò filu. U toiu è rossu.".
Sarà ch'un vuliva tantu intratenna a cumberta, dissi : "Cinqui bacini, o zì ?". Tandu edda : "Sei". "Sei", rispundò Sarratu fora, "Sei, e vinarè, l'indussarè à pruvaddu da cui à un mesi, m'hai capitu ?!". 
"Sei bacini " ripigliò Sarratu filendu a strada di i Fiuminali u cori alegru, ma ancu un poccu di primura. Tandu pinsò in sè stessu : "Ma chi t'avaraghju avutu ancu stu filu rossu ?
Fia u fusu à chi ni l'ha l'usu !"

U Signori dà i panni sicondu à u frettu.

Un sogu pò ciò che t'aghju avutu l'altru ghjornu. Mi ni vultava in casa à magnà, quandu aghju intesu Petru Untu chjamà (Petru è un bancarrotu, Balaninu). Era in piazza à a funtana, adisperatu e solu. E tandu, un sogu ciò ch'e m'ha pigliatu, l'aghju compru un curuleddu di u filu rossu. U m'aghju missu ind'a stacca che nimu un mi vidissi.
M'è custatu una baiocca. A sera à Antoni, l'avivu pigliatu à scoppa. Petru è frimatu stunatu, ma un ha
dettu nienti mirè, ch'eddu era cuntenti d'essasi vindutu qualcosa. Ha chjamatu dinò, ha aspitatu un
pucareddu, e pò ha tiratu u bancu insin'a a Barrulaccia. E ha chjamatu dinò. M'è ghjuntu u rizoccu e sogu intrutu in casa.