Zia Ghjorma l'aviva chjamatu à rifà a ziglia ma, fatta ch'edda era, un era micca liscia com'edda vuliva.
"Ma chi sò ssi travaglii ? " dissi a vecchja. Tandu u maestru : " Sapetti ziglii n'aghju fattu parechji" e si vantava : "mi chjamani à mè, da par tuttu ". Si vantava di i sò soldi vinti par via di i sò qualitai : " In Italia ci ho le case, le pili di linzoli..."
Tandu Zia Ghjorma fina e gattiva : "Ma chi setti vinutu à fà cui, tandu ? "
Zia Ghjorma (un'antra), a me arcizia (me frateddu è statu chjamatu par edda).
Un ghjornu si ni fala à a villa à fà i spesi di l'annata. In più di u restu, vuliva una croci pà a camara di Zia Antunietta, a suredda. E cui e culà... ghjunghji ind'a Naceru. Cuì, si trova un crucifissu chi li piaciva assai e cerca à fà calà u prezzu.
Tandu eddu maliziosu :
"Comu o Madama, niguzieti à Cristu ?!! "
" E vò ? U vinditi !!! " rispundò Zia Ghjorma à brusgia-brusgia !
" A donna è l'arca di a malizia" m'ha dettu un ghjornu Ghjuvana, maliziosa. E l'arca di u forru dinò ?
