Meziornu menu un quartu in Piazza à a Funtana. « Comu stemi andendu sta mani ? » dissi Santu cù a sò vucciaredda dolci, dolci à i trè ghjuvanutteddi : Antoni, sempri incustumatu e drittu com’à Battesti, Ghjuvanni smilatu e Sarratu fora.
Sarratu, omu di fattu, lampò : « Chi vuleti ch’eiu vi dicu, o zì ? Sò cinqui ghjorni d’avà chi l’animali un sortani micca e chi nò manchemi di tuttu. Sta mani sogu andatu à fà a frasca, ma sappetti era tutta pigliata da u cotru. A locu à locu si pò truvà, qualcusareddu… un poccu di magnumi, ind’a Currachjina, ma è raru e semi trenta in paesi à batta a campagna pà a listessa cosa. U poccu d’orzu chi m’arristava l’aghju spartutu ancun’ Antunareddu. Ma dumani ? Pari chi u frettu si sia arradicatu à ssi custeri. Eiu, di poi chi mi n’invengu,a dicu : un s’è mai vistu una cosa cusigna, e pò a dici ancu zi Larenzu ! Di marzu… i vacchi fiumi, fiumi cusì, i cignali chi pattini a fami ! Aiò un s’è mai vistu ! Chi disgrazia, oh … sò cosi d’altru mondu, sò !»
« U piattu di suppa ci sarà sempri » aghjustò Santu, « Ma è ghjusta, un alunghemi u fattu, o Sarrà, t'hai a raghjò, emi à veda dumani ancu u cunsigliu ciò chi si pudarà fà ».
